प्रधानमन्त्रीको भारत भ्रमणबारे संसदलाई जानकारी गराउन कांग्रेसको माग
समाज खबर संवाददाता |
काठमाडौं । नेपाली कांग्रेसले प्रधानमन्त्री पुष्पकमल दाहाल प्रचण्डको भारत भ्रमणबारे सदनलाई जानकारी गराउन माग गरेको छ ।
शुक्रबारको प्रतिनिधिसभाको बैठकमा नेपाली कांग्रेसका प्रमुख सचेतक रमेश लेखकले प्रधानमन्त्री भारत भ्रमण गरेर फर्किएको पाँच दिन हुँदा पनि संसदमा उपस्थित भएर जानकारी नगराएको भन्दै सरकारको ध्यानाकर्षण गराएका हुन् ।
उनले प्रधानमन्त्री संसदमा नआएको बताउँदै सरकारले संसदको गरिमालाई कमजोर बनाएको भन्दै आपत्ति जनाए । उनले भने, ‘प्रधानमन्त्री भारत भ्रमणबाट फर्केको पनि पाँच दिन भइसकेको छ । प्रतिपक्षी दल धैर्यतापूर्वक कुरेर बसेका थियौं भारतको भ्रमणबारे सदनमा आएर जानकारी गराउनुहोला भनेर । पाँच दिनसम्म यहाँ आउन सक्नुभएन । के प्रधानमन्त्री सदनदेखि डराउनुभएको हो ?’
उनले राष्ट्रपति र प्रधानमन्त्री देश बाहिर गएको कुरा अखबारबाट थाहा पाउनुपर्ने दुर्भाग्य भएको बताए । त्यस्तै लेखकले गृहमन्त्री रवि लामिछानेले संसदमा बोल्दै नेतामाथि गम्भीर आरोप लगाएको विषयमा आफूहरुले जवाफ माग गरेको तर प्रधानमन्त्री संसदमा नै नआएको बताए ।
उनले आगामी बैठकमा प्रधानमन्त्रीको भारत भ्रमण र राष्ट्रपतिको विदेश भ्रमणबारे सरकारलाई जानकारी गराउन सरकारलाई रुलिङ गर्न सभामुखको ध्यानाकर्षण गराउन माग गरेका छन् ।
प्रतिकृया दिनुहोस